Dagur 11

Kl. 18:30.

Í dag var þvílíkt rok í gönguferðinni að ég hélt að ég mundi fjúka á haf út, en það rigndi að minnsta kosti ekki, og það var sólskin með köflum í mestallan dag. Varmáin er bólgin og vatnsmikil, og fossinn sem ég man ekki hvað heitir er tilkomumikill að sjá þar sem kolmórautt vatnið gusast niður hann. Ég hef orðið að loka glugganum hjá mér undanfarnar nætur til að fá svefnfrið fyrir veðrinu, og geri ráð fyrir að skortur á hreinu lofti hafi gert það að verkum hvað mig hefur dreymt undarlega í nótt og síðustu nótt.

Er búin að vera að drepast í bakinu í allan dag, og fór loks út í apótek og keypti Íbúfen. Þarf að tala við lækninn og fá hjá honum Naproxen eða Voltaren, það virkar betur á mig en Íbúfenið.

Brá mér í labbitúr um bæinn eftir hádegið, og varð hissa á því að sjá hvað það eru rosalega margir matsölustaðir hérna, bæði kaffihús, skyndibitastaðir og veitingahús, og flest við sömu götuna. Skal telja þau og birta niðurstöður síðar. Líklega er ferðamannaiðnaðurinn orsökin.

Ég finn að þó ég sé með bakverk, þá er ég að styrkjast og úthaldið að aukast, og harðsperrurnar eru að minnka. Ég er að hugsa um að fara í þolgöngu nr. 4 á morgun. Hún er ca. 10 mínútum lengri en nr. 3 sem ég hef verið að fara í, og heldur hraðari. Ég hef þá helgina til að jafna mig ef ég ofkeyri mig. 

Athugasemdir

[Svava 19.9.2008 kl. 08:37]

Mér varð hugsað til þín í gærkvöldi þegar ég fór í kraftgöngu í Mosfellsbænum með Birnu og fleirum - sem betur fer var nú ekkert skelfilega hvasst...en vá hvað var mikið myrkur! Þar sem gangan fór að stórum hluta fram fyrir utan bæinn þá var þetta orðin einskonar óvissuferð, sérstaklega þar sem um var að ræða misholótta moldarstíga...en ég komst þetta óbrotin ha ha ha :)

Frábært að úthaldið hjá þér sé farið að aukast - hlakka til að heyra hvernig þér líst á gönguhóp 4 :)

Bestu kveðjur,

Svava