Delhi-Shimla

Gærdagurinn fór næstum allur í ferðalög. Ég lagði af stað á lestarstöðina kl. 5:00 um morguninn - basarinn var mjög skuggalegur á þessum tíma sólarhringsins. Lestin fór af stað kl. 5:50, og það var mikill léttir að rúlla út af stöðinni, því lyktin þar er eins og af vel gerjuðum útikamri, enda tæmast lestarklósettin beint niður a teinana og fólk notar þau gjarnan inni a stöðvunum, og það eru meira en 20 lestarpallar þarna...

 

Var komin til Kalka (náið nú í kortabókina...) um 12:30, og svo fór ég með annarri lest til Shimla (líka stafað Simla, svona fyrir þá sem eru búnir að draga fram kortabókina). Sú er svo merkileg að hún er á heimsminjaskrá UNESCO, enda mikið verkfræðiundur. Göngin ein eru yfir 100, og ég veit ekki hvað það eru margar bryr. Himalaja-fjöllin undursamleg og jafnvel dísel-fýlan frá eimreiðinni var framför frá mengunni í Delhi. Loftið hérna uppi er hreint og tært, en brrrr! Það er kalt hérna á nóttunni.

 

Ég fékk frábærar móttökur: það beið eftir mér bíll og bílstjóri og á leiðarenda hitti ég foreldra gestgjafans míns, mjög viðkunnanlegt fólk, og hún kom svo heim skömmu seinna.

 

Í dag fór ég með gestgjafanum mínum upp í vatnsverndarsvæði borgarinnar ásamt hópi af öðru fólki, og það var yndislegt: þykkur, óspilltur skógur í bröttum fjallahlíðum, þægilegt hitastig og skemmtilegt fólk. Borgin hérna er ótrúleg, byggð utan í fjallshlíðum og dreifbyl og falleg. Sum húsin eru hálftimbruð og eins og klippt út úr Shakespeare-leikriti á meðan önnur gætu hafa verið flutt inn frá Sviss.  Bretar byggðu borgina upp á 19 öld og hún var höfuðborg breska Indlands á sumrin þegar hitinn í Kalkútta og seinna Delhi varð of mikill.

 Eins og sjá má er ég komin í tölvu með ritvinnsluforriti – get ekki lofað að þetta verði alltaf svona.

Hef von um að geta hent myndum út á netið fljótlega. Læt vita.

 

 

Athugasemdir

[Inga Lára 1.11.2009 kl. 15:41]

Fegin að heyra að þú ert komin af þessari lestarstöð -  virðist ekki gæfulegt að vera þar um miðja nótt.... Gaman að lesa þessar lýsingar hjá þér Jóhanna, finnst ég næstum vera á staðnum. Hlakka til að heyra meira.

Bestu kveðjur - Inga Lára

[Svava 1.11.2009 kl. 16:16]

Shimla hljómar alveg yndislega - lestarferðinn þangað hljómar aftur á móti ekki alveg eins vel :)

Bestu kveðjur af klakanum (hér frysti sko í nótt),

Svava

[Anna Kapitola 1.11.2009 kl. 21:03]

Þetta hljómar mjög spennandi og margt áhugavert að sjá.  Ánægjulegt líka að hafa innfædda gestgjafa sem gefa þér allt aðra sýn á menningu og samfélag heldur en hinn almenni túristi fær.  Hlakka til að sjá myndir og lesa um hvað á daga þína drífur.

Kær kveðja frá okkur Halla og Guðbjörgu Önnu.

Anna Kap.

[Ingibjörg 2.11.2009 kl. 07:27]

þetta hljómar dásamlega, ég hlakka til að sjá myndir :-)